മതമില്ലാത്ത ഫേസ്ബുക്ക് ജീവനുകള്‍

മതമില്ല, ജാതിയില്ല,
എന്നൊക്കെ സ്റ്റാറ്റസ്.

പ്രൊഫൈലിലും
മറ്റു ചിത്രങ്ങളിലുമോ,
നെറ്റിയില്‍ കുറി,
നെറുകയില്‍ സിന്ദൂരം,
തലയില്‍ തൊപ്പി,

കൈയ്യില്‍ കൊന്ത,
രുദ്രാക്ഷ മാല,
തസ്ബീഹ് മാല,
പിന്നെ കാവിമുണ്ടും.

മതമില്ലാത്ത 
ജീവനാണു പോല്‍.
ഹ്രാ ത്ഫൂ.....
ഹ്രാ ഹ്രാ ത്ഫൂ.....

മതബോധം 
മറച്ചു വെക്കുവാനുള്ളതല്ല
മതമില്ലെങ്കില്‍ അങ്ങിനെ
മതമുണ്ടെങ്കില്‍ അങ്ങിനെ

പലവള്ളത്തിലായ്
കാലുകള്‍ വെക്കുകില്‍,
എവിടെയാണ് വീഴുക,
എവിടെയാണ് കീറുക,
എന്നറിയുക ദുഷ്‌കരം,
എന്നോര്‍ക്കുകയെപ്പൊഴും.

മദ്യത്തുള്ളി

മുഖത്ത് പതിച്ച 
മഴത്തുള്ളി 
ചെറുതെങ്കിലും 
ഉറക്കം മുടക്കാന്‍ 
കരുത്തുറ്റതായിരുന്നു.

കടംകൊണ്ട പേനയാല്‍ 
കവിത കുറിക്കവെ 
ഞാനറിയാതെ 
ആ തറയോട് 
ഇടയിലെപ്പൊഴോ
സല്ലപിച്ചു പോയ്.

വിശക്കുന്നു,
കാലിയാം കീശ
എന്നെ നോക്കി
ചിരിക്കുന്നു
നിശ്ചലം.

ദൈവകരം 
തിരഞ്ഞു ഞാന്‍ 
നടക്കവെ, 
പിന്നില്‍ നിന്നൊരു
വിളിയെന്‍
കാതിലെത്തി.

മദ്യ മധ്യത്തില്‍
ഒരുപാട് കാലം 
ആശയങ്ങള്‍
പങ്കുവെച്ചവന്‍,
സഹപാഠി,
എന്‍ പ്രിയന്‍.

ഒരല്‍പം ഭക്ഷണം
വാങ്ങി നല്‍കൂ.
ഇല്ല പക്ഷെ
മദ്യമെത്രമേല്‍
വാങ്ങി നല്‍കാമെ-
ന്നോതി ചിരിതൂകി
നില്‍ക്കവെ

ഭക്ഷണം നല്‍കുവാന്‍
ഇല്ലാത്ത പണം 
മദ്യത്തിനായ് 
വേണ്ടെന്നോതി
വിശപ്പടക്കി വീണ്ടും 
ഞാന്‍ നടന്നകന്നു.

വിളിച്ചുണര്‍ത്തിയ
മഴത്തുള്ളി
മദ്യത്തുള്ളിയായ് 
മാറുന്ന ലോകത്തെ
ജീവിതം മരണസമാനം
എന്നോതി ദൂരേക്ക്
ദൂരേക്ക് നടന്നകന്നു.