ഇബ്രാഹീമിന്‍ സ്നേഹം പെയ്യുന്ന ഹാജിമാര്‍ 💚

 

------------------------------------------------------

മാവിന്റെ ഉച്ചിയില്‍ നിന്നു ഞാന്‍ കാണുന്നു,

അകലെയെങ്ങുള്ള മക്കയും മദീനയും.

സുഹ്‌റയുടെ ചോദ്യം മനസ്സില്‍ മുഴങ്ങുമ്പോള്‍,

മജീദിന്റെ ഉത്തരം കവിതയായ് മാറുന്നു.

മക്കം കാണാം, മദീനത്തെ ഖുബ്ബയും കാണാം,

ബഷീറിന്റെ വാക്കുകള്‍ ഹൃദയം തൊട്ടുണര്‍ത്തുന്നു.

പറവകള്‍ പാടുന്ന പാട്ടില്‍ ഞാന്‍ മുഴുകി,

അനന്തമാം ലോകം എന്നില്‍ പ്രതിഫലിക്കുന്നു.

ബാല്യകാല സഖിയുടെ ഓര്‍മ്മകള്‍ പോലെ,

നമ്മുടെ യാത്രകള്‍ അനന്തമായ് തുടരട്ടെ.

മാവിന്റെ ചില്ലക്കൊമ്പുകളില്‍ നിന്നും,

മക്കയും മദീനയും കാണാന്‍ നമ്മള്‍ പറക്കട്ടെ.

മക്കയുടെ മിന്നും മിനാരങ്ങളിൽ,

മദീനയുടെ പച്ചപ്പിൻ പരിമളങ്ങളിൽ,

ഹാജിമാരുടെ പുണ്യം പെയ്യുന്ന മണ്ണിൽ,

നമ്മുടെ പ്രാർത്ഥനകൾ മുഴങ്ങുന്നു ‌വിണ്ണിൽ.

ഉയരങ്ങളിൽ നിന്നു കാണുന്നു ഞാൻ,

ഒട്ടകപ്പുറത്തു വരുന്ന ഹാജിമാർ,

അല്ലാഹുവിൻ മഹത്വത്തിന്‍ കാഴ്ചകൾ,

ഇബ്രാഹിമിന്‍ സ്നേഹം പെയ്യുന്ന ഹാജിമാർ.

മക്കയും മദീനയും കാണുന്നു ഞാൻ,

സ്വപ്നങ്ങളിലേക്ക് ഒഴുകുന്നു ഞാൻ,

പ്രാർത്ഥനയുടെ മാറിൽ ചേരുന്നു ഞാൻ,

അനന്തമാമാത്മാവിൽ അലിയുന്നു ഞാൻ.

Mubarak Ravuthar

ഹൃദയത്തിന്റെ നിശ്ശബ്ദതയിൽ

 

ഹൃദയത്തിന്റെ നിശ്ശബ്ദതയിൽ, 

മൃദുവായ് മൊഴികൾ കിടക്കുന്നു,

നൃത്തം ചവിട്ടിയ സന്തോഷം, 

നിശ്ശബ്ദമായ് കരയുന്നു.

സൗഖ്യദായക സ്പർശങ്ങള്‍, 

പ്രത്യാശയുടെ പുതുതാരമായ് ഉദിച്ചിരുന്നു,

സന്തോഷം മാഞ്ഞുപോകുമോയെന്ന ഭയം, 

ഹൃദയത്തിൽ നിഴലുകൾ വീഴ്ത്തുന്നു.

രക്തസമ്മർദ്ദം കടലായലയടിക്കുന്നു, 

ഞരമ്പുകളിൽ ഒരു കൊടുങ്കാറ്റ്,

മരുന്നുകളുടെ പ്രേതബാധിത ചിന്തകൾ, 

അന്ത്യമില്ലാത്ത ഒരു ചങ്ങല.

മായാ ലോകത്തെ സൗഹൃദ സാന്നിധ്യങ്ങള്‍, 

ഒന്നുമല്ലാതെയായ് മാറുന്നു,

വിശാലമായൊരീ സാമൂഹിക ക്രമത്തിൽ,

ഒറ്റയ്ക്കു തന്നെയീ പോരാട്ടം.

ഈദിന്റെ ചന്ദ്രന്‍ ഉദിച്ചിരിക്കുന്നു, 

സമാധാനത്തിന്റെ ഉത്സവം,

കലഹം ഉരുണ്ടു കൂടുന്ന ആത്മാവ്, 

മധുരമായൊരു തലാടല്‍ തേടുന്നു.

അള്ളാഹുവിലേക്ക് ഞാൻ മടങ്ങുന്നു, 

ദൈവികാലിംഗനത്തിൽ ആശ്വാസം തേടുന്നു,

ഈ നീതി ശൂന്യമായ ലോകത്ത്,

സമാധാനം നിറയ്ക്കാൻ പ്രാർത്ഥിക്കുന്നു.

മുബാറക് റാവുത്തർ 😊